Oopololeka ntano dhoku humitha komeho omalukanda mo Otjiwarongo dha tamekithwa

Omupevi minister gweyambulepo lyokomikunda noondoolopa Evelyn !Nawases Taayele ,peha lyepangelo, ohela okwa tamekitha oopololeka dhomayambulepo dha yooloka tadhi lalakanene oku yambulapo omalukanda mo Otjiwarongo.

!Nawases Taayele pethimbo lyoshituthi shoku dhika ondhopi yoopololeka ntano dhomayambulepo,okwati oodola oomilion dha konda 53 odha gandjwa kepangelo,ko Road Fund Administration,elelo lyoshitopolwa Otjozondjupa,oshowo Muni gwa Otjiwarongo.

Oopololeka odha kwatelamo okutunga omakwatathano gomeya,okutulamo oowili dhomeya,okutunga ominino dhoonyata,ondjila ompe yoteya yoo Km 1.8 oshowo ehala  lyomainyanyudho tali tungwa pooha na Karundu Junior Sec school mo Orwetoveni.

Oopololeka otadhi nuninwa unene olukanda Ombili,DRC,Telecom no Tsaraxa Aibes .

Omunambelewa kuluntu gwa Otjiwarongo Mberipura Hifitikeko okwati oopololeka adhike dhika oompe otadhi ka manithwa meni lyoomwedhi hamano.

Omanga ehangano lyo NHE lya gandja ehala mpoka tapa tungwa omagumbo omape geli 40 ko Tseiblagaagte ko Kaiti.

Opololeka yoomwedhi hamanao yongushu yoodola oomilion 5.8 otayi ka gandja omagumbo goondunda yimwe oshowo oondunda mbali okuthika ku May 2026,nokwa tegelelelwa yeetepo oompito dhiilonga ya thika 100.

Ndika eyambulepo lyongaashingeyi lyo NHE mondoolopa,sha landula sho kwali lya tungu omagumbo 77 mo 2020.