Epangelo olina oompangela oku shuna aanilonga 222 mboka iilonga yawo kwali ya hulithwapo ko Walu Fishing okupitila momatsokumwe nomahangano goohi geli gane kohi yopolohalama yo Government Employment Redress Programme

Omahangano otaga ka pewa oo qouta dhoohi shiikwatelela komwaalu gwaanilonga mboka ga kuta.
Opolohalama otayi lalakanene oku yamukulwa iipambele yiilonga iikulu,noku etapo oompito dhiilonga moshikondo shoohi.
Pethimbo lyoonkundathana kOmbaye,ominista yoohi Inge Zamwaani nominista yuuyuki niipambele yiilonga Fillemon Wise Immanuel oya tsakanene nomahangano goohi oku ikunda omatsokumwe omape giilonga kohi yomulandu gwa talululwa goo qouta dhoohi.
Zaamwani tati oonkundathana okwali dha lalanene oku shilipaleka kutya aagandji yiilonga naanilonga oyuuviteko nawa iinakugwanithwa nonkandangala yawo omanga omatsokumwe inaaga shainwa.
Ta yelitha wo kutya aanilonga yamwe otatshi vulika ya ka longe moo Factory ,kashishi ashike onga oo fisherman.
Omahangano goohi oga pulwa ga gongele ookondalaka dhiilonga dha shainwa okuthika koshiwike tashiya,opo epangelo li manithe omatsokumwe, noku gandja oo qouta dhoohi.
Immanuel tiindiile omahangano ga yande omikalo dhiilonga dhaaheli pauyuki ,noku tsa omukumo aanilonga yuuveko ookondalaka dhawo omanga inaayedhi shaina.