OmuPresident Nangolo Mbumba, elitumapo ko USA

September 17, 2024 8 4

OmuPresident Nangolo Mbumba, onghela okwalonda munelomba lomushindi noku litumapo okuya ko New York, USA.

Olopota yapitifilwa oikundaneki onghela okudja mombelewa yomupresident oyati omutwe woshilongo ota kakufa ombinga, moyongalele yopavali yafimana omo mwakwatelwa oshongalele oshi 79th UN General Assembly, osho sha fanekwa shikakaleko okudja mo 19 fiyo 28 September 2024 oshoyo oshongalele sho Future, shoo sha fanekwa shikakufe ombinga okudja mo 20 fiyo 24 September 2024.

Olopota oyati omuPresident Mbumba, ota ka kala omunashipundi woshongalele sho Future, osho tashi ka kwatelwa koshi yekanghameno olo taliti ‘’Elongelo kumwe noilyolongo okutala komongula’’ osho tekeshininga pamwe na Chancellor wa German, Olaf Scholz.

Dr. Mbumba pefimbo loshinakuwanifwa shounashipundi moshongalele, okwa teelelika aka kwatele yoo komesho etulo moilonga loinyangadalwa yafanekelwa oshongalele sho Future, omukanda oo watalika tauka yandja elombwelo opo ovaleli mounyuni velitulemo meenghendabala doku ungaunga nomashongo ataalela enenedu, sha kwatelamo elunduluko longhalo yomepo, eyambidido lomayambulepo opashimaliwa, onghalo yoku hafikapamwe, onghalo yomakuyunguto oshoyo ondjala moilyolongo.

Pefimbo loshongalele oshi UNGA79 omu President Mbumba, okwa teelelika yoo akakale akufa ombinga moikundafanwa ya yooloka, osho sha kwatelamo okushakena na hamaushanga ndjai woiwana yahangana Antonio Guterres, oshoyo oo eli omupresident wo shongalele oshi 79 sho General Assembly Philemon Yang.

Elitumepo lomukwateli komesho wa Namibia, ola talika lili lafimana ku Namibia oku kufa ombinga moikundafanwa yafimana oyo yakwatelamo omayambulepo taakalele, elunduluko longhalo yomepo oshoyo eameno moilyolongo yenenedu.