Epangelo lya Iran olina oompangela oku etapo epangelo lyowina lyo Strait of Hormuz,ndjoka yina esimano enene koshilongo,shiikwatelela komupopiliko gwepangelo Fatemeh Mohajerani.

Mohajerani ta lombwele o RIA NOVOSTI kutya o Strait Of Hormuz oyili eliko lyowina lyoshilongo shawo.

Tati ngaashi ashike omaliko galwe haga longithwa muuwanawa wiilongo ya yooloka,osha simana okweetapo lyowina lyo Strait of Hormuz.

Tati Iran otaka longitha kehe omikalo oku shilipaleka kutya epangelo lyo Strait of Hormuz olya simanekwa.

Mo 11 April,Iran na America oya tameke noonkundathana mo Pakistan sho omupresident gwa America Donald Trump a tseyitha kutya okwaadha etsokumwe na Tehran kompangela yoku kodhekapo iikolokosha uule wiiwike iyali.

Esiku lya landula,omukuluntu gosheendo sha America,omupevi president JD Vance okwa tseyitha kutya Iran na America oya ndopa okwaadha etsokumwe pethimbo lyoonkundathana nosheendo sha Ameerica otashi shuna kegumbo pwaahenna etsokumwe.

Mo 12 April,Trump okwa tseyitha kutya America ota tameke oku kondeka ooskepa adhike tadhi kambadhala okuya nenge oku pitamo mo Strait of Hormuz.

Ta gandja wo elombwelo opo aakwiita yomomeya ya America ya kondeke kehe ooskepa dhoka dha futa Iran dhi pite mo Strait of Hormuz.