Omuyambididi wongudu yopolitika yaMoïse Katumbi, moDRC ayashwa okufya.

Omunhu umwe okwa lopotwa axulifila poshongalele shongudu yopolitika mo  Democratic Republic of Congo.

Oo eli omukwateli komesho wongudu yopolitika moshilongo osho  Moïse Katumbi, okwati , oshiningwanima osha holoka pefimbo osheendo shovayambididi vaye shahangwa tashi kaongala ponele oyo taihangwa moumbuwanhu ushilo woshilando Kindu onghela metivali.

Oo eli omupopiliko wongudu ikwetelwe komesho ku Mr Katumbi yo  Ensemble party,  okwati nakuningwa oshihakanwa okwa yashwa noholo pefimbo ovanhu vahangwa vangudumana novali yoo vaumbwa nomamanya osho sha etififa vamwe vomo vayambididi vamonifwe oiponga.

Edipao lomuyambididi  wongudu yopolitika olili tali holoka oshikando shotete okudja nghene oikonga yomaudifeko omahoololo oupresident  yahovelele konima yomafiku 10 aka dilongela paife,  oyo ya teelelika ikale metifa oule womwedi, omanga oshiwana ina shika hoolola oo ena okuninga omuprsident woshilongo mo  20 December 2023.

Nande ongaho omalelo opaitopolwa opo natango ateelelika atyekosha kombinga yoshiningwanima, ashike Peter Kazadi, eli ominister yoikwameni okwa pula ovakufimbinga momahoololo oupresident vafimaneke omilandu odo datulwapo momalelo pefimbo loikonga yavo ili metifa.

Ee candidate dili 23 okwa lopotwa tadi kakondjela oshipundi shoupresident nova hovela nale noikonga yokuudifako oshiwana.

Mr Katumbi,  oo atalika eli omunangeshefa oshipuna nokwali nale ngoloneya woshitopolwa shouyamba wongopolo sha  Katanga,  okwa talika eli omukondjifi akula womuprsident eli koshipundi Felix Tshisekedi.