Omulongo naya hetatu ya hulitha komanyutu moshitopolwa Ohangwena

Oshitopolwa Ohangwena osha dhidhilika omaso 18 omolwa omanyutu nondjala mo 2024.
Shika oshiikwatelela ku Ngoloneya goshitopolwa Sebastian Ndeitunga.
Moonkundathana no Nampa,ngoloneya okwati omaso oga kwatelamo aakuluntu 3,naanona 14.
Mo 2023,elelo lyoshitopolwa okwali lya ningi omapekapeko,noku tothamo aanamagumbo 48 761 miikandjohogololo ayihe 12 moshitopolwa mbka ya pumbwa eidhopemo lyoondya.
Tati omwaka ndjika oya pumbwa oku talika,notashi vulika ya mone eindjipalo lyomanyutu nondjala moshitopolwa.
Ndeitunga tati aavu 332 oya shangithwa mopolohalama yo Nutrition Assessment Counseling Services,unene moshikandjo Engela na Eenhana.
Opolohalama ohayi gandja ehungomwenyo liitungilutu liikoleleka koompumbwe dhoohandimwe ,uukwatya wawo wuundjolowele nosho tuu.
Ndeitunga ta holola kutya omanyutu ohaga etithwa kokwaahena egameno koondya omolwa oluhepo,okwaahena iilonga niiponga yopaunshithwe ngaashi iikukuta nomafundja.
Ta holola wo omashongo netopolo lyiikulya yoshikukuta,,mwa kwatelwa ondjila itadhi vulu oku endiwa,ompumbwe yomandiki goku topolela iikulya,niikulya inaayi gwana.