Opolifi ya limbililwa kelongifo lili pombada lomakaya okolusheno mokati kovanyasha

Opolifi ya Namibia oya ulika omalimbililo kombinga yelongifo lili pombada lomakaya okolusheno oshoyo elongifo loikolwifa mokati kounona vashona.

Meenghundafana no shikundaneki sho Nampa,  oo eli kakukutu ketanga lo polifi moshilongo Joseph Shikongo,  okwati oveta inasha netonatelo loilongomwa yomakaya,  oyo ta i hangwa mokatendo ko (Act 1 of 2010) ina iyandja  oufemba woku longifa omakaya okolusheno (Vapes) osho tati osha tulapo omwaka wo paveta noku ningifa  shidjuu omalelo enasha neameno akatukile onghatu  ovo hava landifa noku landa oilongomwa oyo.

Nande ongaho Shikongo teshi yelifa nghene ouminsitry wouhaku uli ta talulula elongifo loilongomwa oyo ili ya nyika oshiponga tati ngenge oveta oyo oya talululwa,  nena ota shikayandja oufemba komalelo eameno oku katukila onghatu elongifo lomakaya oo.

Shikongo okwati nonande patulwa omangabeko,  opolifi ya Namibia natango onghee tuu taikondjo yatula ombuda moshixwa tashi pitile moikonga yomonanguwi opamwe no shikondo shetonatelo loipumbiwa oyo haiya moshilongo NamRa, ovanambelewa vetonatelo longhalo nawa yo midingonoko oshoyo omalelo opaitopolwa oku tonatela onghalo.

Shikongo okwe shiyelifa yoo nghene oveta inasha noikolwifa (Act 6 of 1998), tati ina  iyandja oufemba oku landifa oikolwifa kounona veli koshi yomido 18, tati ovo tava monika ondjo ota vadulu oku taalela ehandukilo loku mangwapo noku kufwa yoo oilongomwa yavo yo malandifilo.